U.D. Kryeprokurori i Shtetit kërkon efikasitet në sekuestrimin dhe konfiskimin e pasurive të paligjshme
Ushtruesi i Detyrës së Kryeprokurorit të Shtetit, z. Besim Kelmendi, ka mbajtur takimin e rregullt të kolegjiumit me kryeprokurorët dhe përfaqësuesit e të gjitha prokurorive të Republikës së Kosovës dhe prokurorët e Zyrës së Kryeprokurorit të Shtetit.
Në këtë takim, rëndësi të veçantë iu kushtua rritjes së efikasitetit në sekuestrimin dhe konfiskimin e pasurive të paligjshme dhe shitjes së kësaj pasurie konform dispozitave ligjore.
Po ashtu, z. Kelmendi diskutoi me kryeprokurorët edhe për çështjen e ngritjes së aktakuzave pa marrjen në pyetje të të pandehurit.
Në takim u trajtua edhe zbatimi i Udhëzimit lidhur me lëndët narkotike, me ç’rast secili kryeprokuror i prokurorisë përkatëse njoftoi për veprimet e ndërmarra lidhur me këtë çështje.
Në fund u theksua nevoja e rritjes së efektivitetit të prokurorive gjatë raportimeve periodike dhe vjetore të punës së tyre. /Kosova.info/
